Покистон Афғонистоннинг учта вилоятига ҳужум қилди
Афғонистон билан чегарада ўтказилган махсус операцияда 29 нафар жангари йўқ қилинган.
Покистон хавфсизлик кучлари Афғонистон билан чегарадош ҳудудларда террорчилик гуруҳларига қарши махсус ҳарбий операция ўтказди. Мамлакат расмийларига кўра, амалиёт давомида 29 нафар қуролли жангари йўқ қилинган. Бу ҳақда Reuters хабар берди.
Покистон ахборот ва радиоэшиттириш вазири Аттауллоҳ Тарарнинг маълум қилишича, операция Хайбер Пахтунхва ва Балужистон вилоятларида тинч аҳолига, шунингдек, Карачи шаҳридаги Рейнжерлар штаб-квартирасига уюштирилган ҳужумларга жавобан амалга оширилган.
Қайд этилишича, хавфсизлик кучлари Покистон–Афғонистон чегараси яқинида жойлашган «Жамаат-ул-Аҳрар» ва «Фитна-ул-Хавориж» гуруҳларига тегишли бошпаналар ҳамда истеҳкомларга нишонли зарбалар берган.
Вазирнинг билдиришича, Хайбер Пахтунхва вилоятининг Бажаур туманида ўтказилган операция давомида юқори мартабали дала қўмондони Хон Фарош ҳам йўқ қилинган.
Эслатиб ўтамиз, бундан бир кун аввал қуролли шахслар Карачи шаҳридаги Рейнжерлар штаб-квартирасига ҳужум уюштирган эди. Ҳужум оқибатида уч нафар ҳарбий хизматчи ҳалок бўлган. Расмий маълумотларга кўра, ҳужумчилардан уч нафари йўқ қилинган, яна бири қўлга олинган. Дастлабки тергов натижаларига кўра, ҳибсга олинган шахс Афғонистон фуқароси экани аниқланган.
