Тошкентда кучли шамол: ҳокимлик аҳолини огоҳлантирди
Ноқулай об-ҳаво сабаб симлар узилиши, дарахтлар қулаши ва чанг миқдори ортиши мумкин.
Тошкент шаҳрида кучли шамол кузатилаётгани муносабати билан пойтахт ҳокимлиги фуқароларни эҳтиёт чораларига қатъий риоя қилишга чақирди.
Маълум қилинишича, ноқулай об-ҳаво шароити сабабли электр узатиш тармоқларида симларнинг узилиши, дарахтларнинг қулаши ҳамда ҳавода чанг миқдорининг ортиши эҳтимоли мавжуд.
Шу муносабат билан фуқароларга автомобилларни дарахтлар ва электр узатиш линиялари остида қолдирмаслик, зарурат бўлмаса кўчага чиқишни чеклаш, айниқса аллергия ёки чангга сезувчанлиги юқори бўлган шахсларга эҳтиёт бўлиш тавсия этилди.
Шунингдек, шаҳар бўйлаб ҳаракатланишда ҳушёрликни ошириш, ўзининг ва яқинларининг хавфсизлигини таъминлаш ҳамда шахсий мулкни эҳтиёт қилиш сўралди.
Фавқулодда вазиятлар юзага келганда фуқаролар 1050, 1055, (71) 212-69-80 ва (71) 212-69-82 телефон рақамлари орқали тегишли хизматларга мурожаат қилишлари мумкин.
