Тошкентдаги автомобиль эҳтиёт қисмлари бозорида товламачилик қилган 14 киши қамалди
Жиноий гуруҳ мижозларнинг розилигисиз хизмат кўрсатган жиноий гуруҳ улардан катта миқдорда пул талаб қилган, рад жавоби берганларга таҳдид қилган.
Тошкент шаҳрининг Учтепа туманидаги “Автомобиль эҳтиёт қисмлари” бозори ҳудудида товламачилик билан шуғулланган жиноий гуруҳ аъзоларига нисбатан суд ҳукми чиқарилди.
Тошкент шаҳар судлари маълум қилишича, 29 июнь куни Жиноят ишлари бўйича Учтепа туман судида мазкур жиноят иши юзасидан ҳукм эълон қилиниб, 14 нафар судланувчига 3 йилдан 6 йил 6 ойгача озодликдан маҳрум этиш жазоси тайинланди.
Қайд этилишича, айрим судланувчилар муқаддам судланганлиги сабабли жазони қаттиқ тартибли, қолганлари эса умумий тартибдаги колонияларда ўташи белгиланган.
Тергов материалларига кўра, жиноий гуруҳ аъзолари мижозларнинг розилигисиз автомобилларига турли эҳтиёт қисмлари ва жиҳозларни ўрнатиб, кейинчалик улар учун сунъий равишда оширилган нархларда пул талаб қилган. Хусусан, бозор қиймати 600 АҚШ доллари бўлган хизмат учун фуқародан 13 минг 300 АҚШ доллари ундиришга уринган ҳамда рад жавобини берган мижозни қўрқитиш орқали босим ўтказган.
Яна бир ҳолатда эса улар бошқа бир фуқаронинг автомобилига унинг розилигисиз эҳтиёт қисмларини ўрнатиб, автомобиль калитини олиб қўйган ҳолда босим ўтказиш орқали 15 миллион сўм ундиргани аниқланган.
Суд мажлиси якунида ҳукм мазмуни ҳамда уни белгиланган тартибда шикоят қилиш муддати ва тартиби судланувчиларга тушунтирилди.
