Қашқадарёда мактабга кириш имтиҳонлари тестлари тарқалди
Ихтисослаштирилган таълим муассасалари агентлиги барча тест вариантлари мустақил ишлаб чиқилиши ва саволлар такрорланмаслигини таъкидлади.
Ихтисослаштирилган таълим муассасалари агентлиги Қашқадарё вилоятида 2026/2027-ўқув йили учун ўтказилган кириш имтиҳонлари жараёнида тест материаллари ноқонуний тарқатилгани юзасидан расмий муносабат билдирди.
Агентлик маълум қилишича, 29 июнь куни 5-синфга кириш имтиҳонларининг 1-вариант тест топшириқлари имтиҳон ўтказилаётган ҳудуддан ноқонуний равишда олиб чиқилиб, учинчи шахсларга тарқатилгани аниқланган.
Мазкур ҳолат юзасидан белгиланган тартибда ҳуқуқни муҳофаза қилувчи органларга хабар берилган. Ҳозирда воқеа юзасидан ваколатли идоралар томонидан қонунчиликка мувофиқ ўрганиш ишлари олиб борилмоқда.
Дастлабки маълумотларга кўра, ушбу ҳолат айрим шахсларнинг белгиланган тартибни бузган ноқонуний ҳаракатлари оқибатида юзага келган.
Агентликнинг таъкидлашича, бир кунда бир неча сменада ўтказиладиган имтиҳонларда барча талабгорлар учун тенг ва адолатли шароит яратиш мақсадида ҳар бир смена учун тест вариантлари алоҳида ишлаб чиқилади. Тест топшириқлари мазмунан мустақил бўлиб, саволлар ва жавоб вариантлари такрорланмайди.
Шунингдек, ота-оналар фарзандларини ҳалоллик, қонунларга ҳурмат ва ўз билимига ишониш руҳида тарбиялашга чақирилган. Агентлик имтиҳон материалларини ноқонуний олиб чиқиш, тарқатиш ёки улардан ноқонуний фойдаланиш амалдаги қонунчиликка мувофиқ жавобгарликка сабаб бўлишини эслатган.
Қайд этилишича, кириш имтиҳонлари республика бўйлаб бир вақтда бошланиб, бир вақтда якунланади. Агентлик барча имтиҳонларнинг очиқ, шаффоф ва адолатли ўтишини ҳамда ҳар бир талабгорнинг билими холис баҳоланишини таъминлаш тамойилига қатъий амал қилишини билдирган.
