Германияда васийлик можароси сабаб отишма юз берди

 

Германия шимолидаги Стаде шаҳрида жойлашган ёшлар ва оилаларни ижтимоий қўллаб-қувватлаш марказида юз берган қуролли ҳужум оқибатида 6 киши ҳалок бўлди. Фожиага оилавий келишмовчилик ҳамда фарзанд васийлиги билан боғлиқ можаро сабаб бўлган. Бу ҳақда СNN хабар берди.

 

Дастлабки маълумотларга кўра, отишма оқибатида беш киши воқеа жойида ҳалок бўлган, яна бир киши эса шифохонада олган оғир тан жароҳатлари билан вафот этган. Қурбонларнинг тўрт нафари аёл, икки нафари эркак бўлиб, уларнинг барчаси муассаса ходимлари бўлган. Ҳодиса оқибатида яна бир неча киши турли даражада жароҳат олган.

 

Ҳуқуқ-тартибот идоралари маълум қилишича, жиноятда гумонланаётган шахс Германияда туғилган, асли туркиялик бўлган 45 ёшли эркакдир. У воқеа содир бўлган куни қизи устидан васийлик масаласини муҳокама қилиш учун марказга расмий учрашувга келган.

 

Маълум бўлишича, гумондорнинг уч ойлик қизи ва 34 ёшли турмуш ўртоғи ҳам отишма вақтида бинода бўлган, бироқ уларга шикаст етмаган. Чақалоқ зудлик билан ижтимоий хизматлар ҳимоясига олинган, боланинг онаси эса полиция томонидан сўроқ қилинмоқда.

 

Германия Қуйи Саксония ички ишлар вазири Даниела Беренс ушбу ҳодисани "олдиндан режалаштирилган ва ўта совуққонлик билан содир этилган жиноят" дея баҳолади.

 

Шунингдек, воқеа жойидан қочишга уринган 65 ёшли автомобиль ҳайдовчиси ҳам ҳодисага алоқадорликда гумонланиб қўлга олинган.

 

Германия Президенти Франк-Валтер Штайнмаер ҳамда канцлер Фридрих Мертс ҳалок бўлганларнинг оила аъзоларига чуқур ҳамдардлик билдирди.