Ўзбекистон аҳолиси расман 39 миллион нафардан ошди
Мамлакат аҳолиси жорий статистик ҳисоб-китоблардан 810 минг нафарга кўпроқ экани аниқланди.
Аҳоли ва қишлоқ хўжалигини рўйхатга олиш тадбирининг дастлабки натижаларига кўра, Ўзбекистон аҳолиси сони 39 миллион 47 минг 321 нафарга етди.
Маълум қилинишича, жорий статистик ҳисоб-китобларга кўра мамлакат аҳолиси 38 миллион 236 минг 704 нафар деб баҳоланган бўлса, рўйхатга олиш якунларига кўра ушбу кўрсаткич 810,6 минг нафарга кўпроқ экани аниқланган.
Шунингдек, 1989 йилда ўтказилган сўнгги аҳолини рўйхатга олиш натижалари билан таққослаганда, Ўзбекистон аҳолиси сони қарийб икки баробарга ошгани қайд этилган.
Бундан ташқари, дастлабки маълумотларга кўра, Ўзбекистон ҳудудида бир йилдан ортиқ муддат яшаётган 56 минг 860 нафар хорижий фуқаро рўйхатга олинган. Уларнинг 19 минг 300 нафари Тошкент шаҳрида истиқомат қилмоқда.
Давлатлар кесимида энг кўп рўйхатга олинган хорижий фуқаролар қуйидагилар:
-
Ҳиндистон — 13 312 нафар;
-
Россия — 10 826 нафар;
-
Қозоғистон — 9 425 нафар;
-
Тожикистон — 5 722 нафар;
-
Туркманистон — 5 347 нафар;
-
Қирғизистон — 4 397 нафар;
-
Покистон — 1 433 нафар;
-
Хитой — 1 031 нафар;
-
Туркия — 811 нафар;
-
Жанубий Корея — 691 нафар;
-
Бошқа давлатлар — 3 865 нафар.
