Қашқадарёда 4 киши вояга етмаган қизни зўрлашда гумонланмоқда
Жабрланувчига психологик ёрдам кўрсатилмоқда, ҳолат юзасидан жиноят иши қўзғатилган.
Қашқадарё вилоятининг Яккабоғ туманида вояга етмаган қизга нисбатан содир этилган зўравонлик ҳолати юзасидан жиноят иши қўзғатилиб, тўрт нафар гумонланувчи процессуал тартибда қўлга олинди. Бу ҳақда Болалар омбудсмани маълум қилди.
Қайд этилишича, жорий йилнинг 7 июнь куни вояга етмаган С.Р. Яккабоғ тумани Ички ишлар бўлимига мурожаат қилган. Мазкур мурожаат асосида 8 июнь куни Жиноят кодексининг 128-моддаси билан жиноят иши қўзғатилган.
Дастлабки тергов давомида бир неча турдаги суд экспертизалари тайинланиб, уларнинг хулосаларига кўра, жиноят иши Жиноят кодексининг 118-моддаси 3-қисми бўйича қайта малакаланган. Шундан сўнг Х.Д., Х.Ш., Н.О. ва А.Д. Жиноят-процессуал кодексининг 221-моддаси тартибида ушланган.
Ҳозирда жиноят иши юзасидан Яккабоғ тумани ИИБ ҳузуридаги тергов гуруҳи томонидан дастлабки тергов ҳаракатлари давом эттирилмоқда.
Шунингдек, жабрланувчи вояга етмаганга «Инсон» ижтимоий хизматлар маркази томонидан психологик ёрдам кўрсатилмоқда, унинг оиласига эса юридик ҳамда ижтимоий-психологик қўллаб-қувватлаш чоралари ташкил этилган.
Болалар омбудсмани мазкур иш юзасидан вояга етмаган жабрланувчининг қонуний манфаатлари ва процессуал ҳуқуқлари таъминланиши устидан назоратни давом эттираётганини билдирган.
