Кот-д'Ивуарда сув тошқинлари оқибатида 60 га яқин одам ҳалок бўлди
Қўшни Ганада ҳам тошқинлар туфайли 12 киши вафот этган. Расмийлар қидирув ишлари давомида яна қурбонлар аниқланиши мумкинлигини билдирди.
Кот-д'Ивуарда бир неча кундан буён тинмаётган кучли ёмғирлар оқибатида юзага келган сув тошқинлари ва кўчкилар натижасида камида 59 киши ҳалок бўлди. Бу ҳақда Sky News хабар берди.
Ҳукумат вакили Амаду Кулибалининг айтишича, қидирув-қутқарув ишлари давом этаётгани боис яна қурбонлар аниқланиши мумкин.
Табиий офат шанба кунидан бошлаб ёққан жала ёмғирлари ортидан юзага келган. Ҳалок бўлганларнинг бир қисми мамлакатнинг иқтисодий маркази Абиджандаги Аттекубе ва Ёпугон туманларида қайд этилган.
Қўшни Ганада ҳам кучли ёғингарчилик кенг кўламли сув тошқинларига сабаб бўлди. Мамлакатнинг турли ҳудудларида, жумладан пойтахт Аккрада юз берган тошқинлар оқибатида камида 12 киши ҳалок бўлган.
Душанба куни Аккра ва унга туташ Тема шаҳрида кўплаб кўчалар ҳамда биноларни сув босиб, айрим ҳудудларга кириш имконсиз бўлиб қолди. Ҳалок бўлганлар орасида Ачимота–Агбогблошиэ туманида сув оқими олиб кетган она ва унинг фарзанди ҳам бор.
Гана Миллий ёнғин хизмати маълумотига кўра, сув босган ҳудудларга етиб бориш қийинлашгани сабабли қутқарувчилар ҳарбийлардан ёрдам сўрашга мажбур бўлган. Сешанба куни ҳам айрим маҳаллалар қисман сув остида қолаётган эди.
Гана Миллий офатлар бошқармаси душанба куни эрталаб аҳолидан уйларига сув кираётгани ҳақида кўплаб мурожаатлар келиб тушганини маълум қилди.
Мамлакат метеорология агентлиги эса ҳафта давомида, айниқса Аккра ва унинг атрофида яна кучли ёғингарчилик кузатилиши мумкинлиги ҳақида аҳолини огоҳлантирди.
