Навоийда ҳайдовчи транспорт назорати инспекторига пора таклиф қилди

 

Навоий вилоятида Транспорт назорати инспекцияси ходимига пора таклиф қилган ҳайдовчига нисбатан жиноят иши қўзғатилди. Бу ҳақда Транспорт назорати инспекцияси хабар берди.

 

Маълум қилинишича, Транспорт назорати инспекциясининг Автомобиль транспортида назорат қилиш Навоий вилояти ҳудудий бўлими инспекторлари хизмат вазифасини бажариш чоғида Кармана туманидаги «Самарқанд» ЙПХ масканида «FAW» русумли юк автомобилини текшириш учун тўхтатган.

 

Ҳужжатларни кўздан кечириш жараёнида транспорт воситасида Маъмурий жавобгарлик тўғрисидаги кодекснинг 125¹-моддаси 4-қисмида назарда тутилган ҳуқуқбузарлик аломатлари аниқланиб, белгиланган тартибда маъмурий баённома расмийлаштириш бошланган.

 

Шу вақтда ҳайдовчи Ж.Б. маъмурий баённома расмийлаштирилмаслиги эвазига инспекторга 1 миллион сўм пора таклиф қилган. Инспектор бундай ҳаракатлар жиноий жавобгарликка сабаб бўлиши мумкинлиги ҳақида огоҳлантирганига қарамай, фуқаро ноқонуний таклифини давом эттириб, хизмат вазифасини бажаришга тўсқинлик қилган.

 

Шундан сўнг ҳолат юзасидан Транспорт назорати инспекцияси раҳбарияти, коррупцияга қарши курашиш бўйича масъул ходим, Навоий вилояти Ички ишлар бошқармаси ҳамда Транспорт прокуратурасига зудлик билан хабар берилган.

 

Ўтказилган тезкор тадбир давомида ҳайдовчи пора сифатида таклиф қилган пул маблағининг 700 минг сўмини инспекторга бераётган вақтида ҳуқуқни муҳофаза қилувчи органлар ходимлари томонидан ашёвий далиллар билан қўлга олинган.

 

Ҳозирда мазкур ҳолат юзасидан Жиноят кодексининг тегишли моддалари асосида жиноят иши қўзғатилиб, дастлабки тергов ҳаракатлари олиб борилмоқда.