Ўрозовга Бундеслиганинг етакчи жамоаси қизиқиш билдирмоқда — ОАВ
Футболчи “Боруссия Мёнхенгладбах”нинг ёзги трансферлар учун шакллантирилган кузатув рўйхатидан жой олган.
Ўзбекистон миллий терма жамоаси ҳимоячиси Жаҳонгир Ўрозов фаолиятини Германия Бундеслигасида давом эттириши мумкин.
Германиянинг Kicker нашри ёзишича, 22 ёшли футболчи “Боруссия Мёнхенгладбах”нинг ёзги трансферлар учун шакллантирилган кузатув рўйхатидан жой олган.
Манбага кўра, Мёнхенгладбах клуби янги мавсум олдидан марказий ҳимоя чизиғини кучайтиришни режалаштирмоқда. Шу сабаб селекция бўлими бир қатор ёш ҳимоячиларни кузатмоқда ва Ўрозов ҳам ана шундай номзодлардан бири сифатида кўрилмоқда.
Жаҳонгир Ўрозов айни пайтда Самарқанднинг “Динамо” клубида тўп суради. Унинг самарқандликлар билан амалдаги шартномаси 2027 йил якунига қадар мўлжалланган. Ҳимоячи яқинда Ўзбекистон миллий терма жамоаси сафида тарихий ЖЧ–2026 мусобақасида иштирок этди.
У Колумбияга қарши баҳсда захирадан майдонга тушган бўлса, Конго ДРга қарши учрашувни асосий таркибда бошлаб, 82 дақиқа ҳаракат қилди.
Ҳозирча “Боруссия Мёнхенгладбах” томонидан расмий таклиф ёки музокаралар бошланганига доир маълумот йўқ. Бироқ Kicker маълумотига кўра, Бундеслига вакили ўзбекистонлик ҳимоячининг трансфери имкониятларини ўрганишда давом этмоқда.
