ЖЧ — 2026: Ҳарри Кейн Англияни қутқарди
Инглизлар Конго ДРни мағлуб этиб, 1/8 финалга чиқди.
2026 йилги жаҳон чемпионатининг 1/16 финал босқичида Англия терма жамоаси Конго ДРга қарши майдонга тушди ва қийин кечган баҳсда 2:1 ҳисобида ғалаба қозонди.
Учрашув кутилмаганда африкаликлар устунлиги билан бошланди. 7-дақиқада Браян Сипенга инглизлар дарвозабонини доғда қолдириб, Конго ДРни ҳисобда олдинга олиб чиқди.
Биринчи бўлимда Англия кўплаб ҳужумлар уюштирган бўлса-да, танаффусга қадар ҳисобни ўзгартира олмади. Иккинчи бўлимда Томас Туҳел амалга оширган ўзгаришлар ўйин суръатини оширди.
75-дақиқада жамоа сардори Ҳарри Кейн ҳисобни тенглаштирди. Орадан 11 дақиқа ўтиб эса тажрибали ҳужумчи яна ўз сўзини айтиб, дублни расмийлаштирди ва Англияга ғалабани тақдим этди. Шу тариқа, Англия 2:1 ҳисобидаги иродали ғалаба эвазига жаҳон чемпионатининг 1/8 финалига йўл олди. Конго ДР эса мусобақа билан хайрлашди.
