Америка ёрдами энди Исроил учун зарур эмас — Нетаняху
Исроил Бош вазири мамлакат АҚШнинг молиявий ёрдамидан воз кечишини эълон қилди.
Исроил Бош вазири Бенямин Нетаняху мамлакат АҚШнинг молиявий ёрдамисиз ҳам фаолият юритишга тайёр эканини маълум қилди деб хабар беради News 18.
1 июль куни ўтказилган матбуот анжуманида сўзга чиққан Нетаняху Исроил иқтисодиёти ҳозирги кунда етарли даражада мустаҳкам бўлиб, АҚШдан олинаётган молиявий кўмакка эҳтиёж қолмаганини таъкидлаган.
Унинг сўзларига кўра, ҳукумат Америка молиявий ёрдамини босқичма-босқич тўхтатиш жараёнини имкон қадар тезроқ бошлашни мақсад қилган.
"Мен Америка ёрдамини тўхтатмоқчиман. Бу ижтимоий ёрдамга ўхшайди ва биз энди бунга муҳтож эмасмиз", — деган Исроил бош вазири.
Нетаняхунинг таъкидлашича, Исроил иқтисодиёти энди кичик иқтисодиёт эмас ва мамлакат АҚШ томонидан ажратилаётган маблағлар ҳажмини мустақил равишда қоплай олиш салоҳиятига эга.
Матбуот анжуманида у минтақавий хавфсизлик масалаларига ҳам тўхталиб, Исроил Фаластин давлатининг ташкил этилишига қарши эканини яна бир бор билдирган. Шунингдек, Эрон билан боғлиқ вазият юзасидан зарурат туғилган тақдирда Исроил яна ҳарбий чоралар кўришга тайёрлигини маълум қилган.
Бундан ташқари, Нетаняху Исроил қўшинлари Ҳизбуллоҳ таҳдиди сақланиб қолаётган экан, Ливан ҳудудида қолишда давом этишини таъкидлаган.
