Андижондаги заправкада портлаш юз берди
Ҳодиса оқибатида тан жароҳати олганлар бор.
2 июль куни соат 10:30 атрофида Андижон вилояти Хонобод шаҳри "Анҳор" маҳалла фуқаролар йиғинида жойлашган автомобилларга газ тўлдириш компрессор шохобчасининг компрессор хонасида ҳаво-газ аралашмаси чақнади. Бу ҳақда вилоят ФВБ маълум қилди.
Хабарга кўра, воқеа тўғрисидаги мурожаат келиб тушгач, қутқарув бўлинмалари зудлик билан ҳодиса жойига етиб борган. Чақнаш оқибатида компрессор хонасининг 30 квадрат метр майдондаги том қисми, шунингдек, эшик ва деразаларига зарар етган.
Ҳодиса натижасида икки нафар фуқаро тан жароҳати олиб, уларга малакали тиббий ёрдам кўрсатиш мақсадида шифохонага ётқизилган. Ҳалок бўлганлар қайд этилмаган.
Ҳозирда чақнашнинг келиб чиқиш сабаблари ва етказилган зарар миқдори аниқланмоқда.
