Таиландда даҳшатли ЙТҲ: 11 ёшли бола роҳиблар гуруҳини уриб юборди
Бола 34 нафар роҳиблар кетаётган гуруҳни уриб юборган, ҳалок бўлганлар сони 10 нафарга етди.
Таиланднинг Мукдаҳан вилоятида 11 ёшли бола ота-онасига тегишли пикапни рухсатсиз бошқариб чиқиб, йўл бўйлаб кетаётган буддист роҳиблар гуруҳини уриб юборди. Ҳодиса оқибатида 10 нафар роҳиб ҳалок бўлди, яна бир неча киши оғир тан жароҳатлари олди. Бу ҳақда AmarinTV хабар берди.
Маълумотларга кўра, бола оиласига тегишли Isuzu русумли пикапни олиб чиқиб, Мукдаҳан шаҳридан Убон Ратчатҳани томонга йўл олган. Шу вақтда у 34 нафар буддист роҳибдан иборат гуруҳни уриб юборган. Ҳодиса вақтида яқин атрофда бўлган яна бир фуқаро ҳам жароҳатланган.
Воқеа жойида беш нафар роҳиб ҳалок бўлган. Оғир аҳволда шифохонага етказилган яна беш нафар жабрланувчининг ҳаётини сақлаб қолишнинг имкони бўлмаган. Қолган жабрланганларнинг айримлари шифохонада даволанмоқда.
Ҳодиса юзасидан Таиланд транспорт вазирининг ўринбосари воқеа жойига етиб борган. Дастлабки маълумотларга кўра, фожиа содир бўлган йўл аввал ҳам кўплаб йўл-транспорт ҳодисалари қайд этилган хавфли ҳудудлардан бири ҳисобланади.
Воқеадан сўнг 11 ёшли бола полиция бўлимига олиб борилган. Унинг бувиси журналистларга боланинг автомобилни олиб чиқишига тўсқинлик қилишга уринганини, бироқ бунга улгурмаганини маълум қилган. Бобосининг айтишича, у неварасига ҳеч қачон автомобиль бошқаришни ўргатмаган.
