Тошкентда ўз жонига қасд қилишга уринган йигит қутқариб қолинди
Учтепа туманида патруль-пост хизмати ходими ва ИИВ Академияси курсанти Бўзсув каналига тушиб кетган йигитни сувдан олиб чиқди.
Тошкентнинг Учтепа туманида патруль-пост хизмати ходими ва ИИВ Академияси курсанти Бўзсув каналига тушиб кетган йигитни қутқариб қолди. Бу ҳақда ИИВ Жамоат хавфсизлиги департаменти хабар берди.
Ҳодиса 2 июль куни соат тахминан 16:30 да Учтепа тумани ҳокимлиги биноси олдида ўтказилаётган ёшлар фестивали вақтида содир бўлган.
Жамоат тартибини сақлашга жалб қилинган ички ишлар органлари ходимлари патруллик олиб бораётган вақтда ҳокимлик биноси ортидан оқиб ўтувчи Бўзсув каналидан сув шовқинини эшитган. Воқеа жойига етиб борган Учтепа тумани ИИБ патруль-пост хизмати ходими, оддий аскар Н. Пўлатбеков ҳамда ИИВ Академиясининг 2-босқич курсанти Д. Хайруллаев каналга тушиб кетаётган йигитни кўриб, уни сувдан олиб чиққан.
Жабрланувчига биринчи тиббий ёрдам кўрсатилган. Шундан сўнг тез тиббий ёрдам бригадаси уни шифохонага олиб кетган.
Дастлабки текширувда аниқланишича, фуқаро интернет орқали ташкил этилган азартли ўйинларда катта миқдорда пул йўқотганидан сўнг ўз жонига қасд қилишга уринган. Ҳолат юзасидан тегишли текширув ишлари олиб борилмоқда.
