“Ўзбекистон катта орзулар амалга ошишини бутун дунёга исботлади” — Инфантино
FIFА президенти Ўзбекистон терма жамоасини Жаҳон чемпионатидаги тарихий иштироки билан табриклади.
FIFА президенти Жанни Инфантино Ўзбекистон миллий терма жамоасини 2026 йилги Жаҳон чемпионатидаги тарихий дебюти муносабати билан табриклаб, жамоа мамлакат футболи тарихида муҳим саҳифа очганини таъкидлади.
У ўзининг расмий саҳифасида эълон қилган мурожаатида Ўзбекистон терма жамоаси нафақат мамлакат футболи, балки бутун дунё учун катта орзулар амалга ошиши мумкинлигини намоён этганини қайд этди.
“Сиз бутун дунёга ва юртингиздаги инсонларга ҳар қандай катта орзу амалга ошиши мумкинлигини исботладингиз. FIFА Жаҳон чемпионатидаги илк голингизга стадионда гувоҳ бўлдим ва ўша лаҳзада сиз ҳамда мухлисларингиз қандай ҳаяжонни бошдан кечирганини жуда яхши ҳис қилдим”, — деди FIFА раҳбари.
Инфантино ушбу тарихий иштирок Ўзбекистонда футболнинг янада ривожланишига кучли туртки беришига ишонч билдириб, миллий терма жамоага келгуси мусобақаларда муваффақият тилади.
Маълумот учун, Ўзбекистон миллий терма жамоаси ўз тарихида илк бор FIFА Жаҳон чемпионатининг гуруҳ босқичида иштирок этди. Жамоа гуруҳ босқичида Колумбия, Португалия ҳамда Конго ДРга қарши баҳс олиб борди. Терма жамоанинг сардори Элдор Шомуродовнинг Конго ДР дарвозасига урган голи эса турнир гуруҳ босқичининг энг чиройли голи деб топилган эди.
