Тошкентдаги мудҳиш ЙТҲда икки автомобилни ҳам вояга етмаганлар бошқаргани аниқланди
ЙТҲ оқибатида бир аёл вафот этган. Lacceti иккига бўлиниб кетган.
Тошкент шаҳрида Lacetti ва Kia K5 автомобиллари иштирокида содир бўлган йўл-транспорт ҳодисаси оқибатида Lacetti автомобили иккига бўлиниб кетгани ҳақида хабар берилганди.
Аниқланишича, ҳодиса вақтида ҳар икки автомобилни ҳам вояга етмаган мактаб ўқувчилари бошқарган. Бу ҳақда Йўл ҳаракати хавфсизлиги бошқармаси маълум қилди.
Қайд этилишича, ЙТҲ оқибатида бир аёл ҳалок бўлган, унинг фарзанди эса онасиз қолган.
Йўл ҳаракати хавфсизлиги бошқармаси томонидан эълон қилинган видеода вояга етмаганлардан бирининг отаси ўғли автомобилни ухлаб ётган пайтда олиб чиқиб кетганини айтган.
“Ухлаётганимизда олиб чиқиб кетган. Мен ўзим ҳам ҳайрон бўлдим ўша куни. Ўғлим шунақа жиноят ишини қилди. Беэътибор бўлганим учун энди мен ҳам бунга сабабчиман”, — дейди у.
Яна бир вояга етмаганнинг онаси эса фарзандининг автомобиль бошқараётганидан бехабар бўлганини билдирган.
“Боламнинг машина ҳайдашини билмасдим. Чунки биз бирор марта қўлига калит бермаган инсонмиз-да. Менинг ўзимнинг шахсий машинам бор, лекин унга ўтирмаган”, — дейди у.
Маълумот ўрнида, аввалроқ Ўзбекистонда вояга етмаганларнинг автомобиль бошқаришига йўл қўйган шахсларга нисбатан жавобгарликни кучайтириш режалаштирилаётгани ҳақида хабар берилганди.
