Канада ва Кореяга юбориш билан боғлиқ фирибгарлик ҳолатлари аниқланди
Гумонланувчилар ишга ва ўқишга юборишни ваъда қилиб, фуқаролардан минглаб АҚШ долларини фирибгарлик йўли билан қўлга киритган.
Ўзбекистонда фуқароларни Жанубий Кореяга ишга ва ўқишга юборишни, шунингдек, виза ва ҳужжатларни расмийлаштириб беришни ваъда қилган бир неча шахсларнинг фирибгарлик ҳолатлари фош этилди.
Бош прокуратура ҳузуридаги Департаментнинг Тошкент вилояти бошқармаси томонидан ўтказилган терговга қадар текширувда муқаддам судланган фуқаро М.А. икки нафар фуқарони Жанубий Кореяга ишга юборишни ваъда қилиб, улардан 12 минг АҚШ долларини фирибгарлик йўли билан олгани аниқланди.
Шунингдек, Департаментнинг Қувасой шаҳар бўлими томонидан ўтказилган текширувда фуқаро Д.Р. бир фуқарони Жанубий Кореядаги олий таълим муассасасига ўқишга киритиш ва виза олиб беришни ваъда қилиб, 11 минг АҚШ долларини қўлга киритгани маълум бўлди. Мазкур маблағнинг 200 АҚШ доллари процессуал тартибда қайтарилгани расмийлаштирилган.
Яна бир ҳолатда, Департаментнинг Пахтаобод тумани бўлими томонидан ўтказилган текширув давомида муқаддам судланган фуқаро Х.М. икки нафар фуқарога Канада ва Жанубий Кореяга кетиш учун ҳужжатларни тайёрлаб беришни ваъда қилиб, жами 4 945 АҚШ долларини фирибгарлик йўли билан олгани аниқланган.
Мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари давом эттирилмоқда.
