Республика бўйлаб 6 та ҳудудда гиёҳвандлик билан боғлиқ ҳолатлар фош этилди
Тезкор тадбирларида 1,5 килограммдан ортиқ марихуана, героин ҳамда 900 дан ортиқ каннабис ўсимлиги аниқланиб, мусодара қилинди.
Давлат хавфсизлик хизмати ва Ички ишлар вазирлиги ходимлари ҳамкорлигида "Хавфсиз ва соғлом юрт" тезкор-профилактик тадбирлари доирасида ўтказилган рейдлар давомида Наманган, Самарқанд, Хоразм, Тошкент ва Андижон вилоятларида гиёҳвандлик воситалари ҳамда каннабис ўсимликларини ноқонуний сақлаш ва етиштириш билан боғлиқ ҳолатлар фош этилди. Бу ҳақда ДХХ Zamon.uz' га хабар берди.
Наманган вилоятининг Норин туманида 1961 йилда туғилган фуқаронинг хонадони кўздан кечирилганда, у сотиш мақсадида сақлаб келаётган 1 килограмм 595 грамм марихуана процессуал тартибда мусодара қилинган.
Чортоқ туманида эса 1973 йилда туғилган шахс ўзига тегишли томорқада 839 туп каннабис ўсимлигини етиштириб келаётгани аниқланган.
Самарқанд вилоятининг Ургут туманида яшовчи 1995 йилда туғилган фуқаро Тойлоқ тумани ҳудудида автомашинасида ҳаракатланаётган вақтда тўхтатилиб текширилган. Ундан 20 грамм героин ашёвий далил сифатида олинган.
Хоразм вилоятининг Қўшкўпир туманида эса аввал ҳам гиёҳвандлик воситалари савдоси билан боғлиқ жинояти учун судланган 1962 йилда туғилган шахс 36 туп каннабис ўсимлигини етиштираётгани фош этилган.
Тошкент вилоятининг Янгийўл шаҳрида яшовчи, илгари ҳам шу турдаги жиноят учун судланган 1973 йилда туғилган фуқаро ўз ҳовлисида ташкил этилган иссиқхонада 22 туп каннабис парваришлаётгани аниқланган.
Шунингдек, Андижон вилоятининг Қўрғонтепа туманида истиқомат қилувчи 1965 йилда туғилган шахснинг томорқасидан 10 туп каннабис ўсимлиги топилган.
Ҳозирда мазкур ҳолатларнинг барчаси юзасидан терговга қадар текширув ишлари олиб борилмоқда.
