Ўзбекистонда биринчи Халқаро ислом цивилизацияси форуми ўтказилади
Форумда 50 дан ортиқ мамлакатдан 300 га яқин хорижий меҳмон иштирок этиши кутилмоқда.
2026 йил 7–11 июль кунлари Тошкент, Самарқанд ва Термиз шаҳарларида I Халқаро ислом цивилизацияси форуми бўлиб ўтади. Шу муносабат билан Ўзбекистондаги Ислом цивилизацияси марказида форумга бағишланган "Тинчлик, бағрикенглик ва илм-маърифат йўли" мавзусида брифинг ташкил этилди.
Брифингда 7–11 июль кунлари Тошкент, Самарқанд ва Термиз шаҳарларида бўлиб ўтадиган форум дастури ҳақида оммавий ахборот воситалари вакилларига батафсил маълумот тақдим этилди.
Маълум қилинишича, форум Ўзбекистондаги Ислом цивилизацияси маркази, Ўзбекистон Республикаси Дин ишлари бўйича қўмитаси, Имом Мотуридий, Имом Бухорий ва Имом Термизий халқаро илмий-тадқиқот марказлари, Ўзбекистон мусулмонлари идораси, Ўзбекистон халқаро исломшунослик академияси ҳамда Ислом олами таълим, фан ва маданият масалалари бўйича ташкилоти (ICESCO) ҳамкорлигида ташкил этилмоқда.
Форумда 50 дан ортиқ мамлакатдан 300 га яқин хорижий меҳмон иштирок этиши кутилмоқда. Улар орасида давлат ва жамоат арбоблари, вазирлар, муфтийлар, академиклар, таниқли исломшунос олимлар, қўлёзмашунослар, музей ва кутубхоналар раҳбарлари, нуфузли халқаро ташкилотлар ҳамда оммавий ахборот воситалари вакиллари бор. Бу эса форумнинг халқаро мулоқот ва академик ҳамкорлик майдонига айланиши кутилаётганидан далолат беради.
Қайд этилишича, I Халқаро ислом цивилизацияси форуми тинчлик, бағрикенглик ва илм-маърифат ғояларини кенг тарғиб этиш, шунингдек, Ўзбекистоннинг бой илмий ва маънавий меросини халқаро ҳамжамиятга яна бир бор намоён этиш учун муҳим халқаро майдон бўлиши кутилмоқда.
