Сурхондарёда икки аёлни фоҳишалик учун Туркияга юбормоқчи бўлган аёл ушланди
Гумонланувчи жабрланувчилар учун авиачипталар харид қилиб, бунинг эвазига 6 минг АҚШ доллари талаб қилган.
“Хавфсиз ва соғлом юрт” ойлиги доирасида Сурхондарё вилояти Ички ишлар бошқармаси Тезкор-қидирув хизмати ҳамда унинг ҳудудий бўлинмалари ходимлари ҳамкорлигида ўтказилган тезкор тадбир давомида одам савдоси билан боғлиқ жиноят фош этилди. Бу ҳақда Ички ичлар вазирлиги хабар берди.
Аниқланишича, Ангор туманида 2005 йилда туғилган аёл моддий манфаат эвазига икки нафар аёлни фоҳишалик билан шуғулланиш мақсадида Туркиянинг Истанбул шаҳрига юборишни режалаштирган.
Гумонланувчи жабрланувчилар номига Термиз–Истанбул йўналиши бўйича ҳар бири 580 АҚШ доллари қийматидаги авиачипталарни харид қилган. Бунинг эвазига эса келгусида улардан 6 минг АҚШ доллари олиши келишилган.
Тезкор тадбир давомида гумонланувчи икки нафар аёлни Термиз халқаро аэропорти орқали Истанбулга жўнатаётган вақтида ашёвий далиллар билан қўлга олинган.
Мазкур ҳолат юзасидан унга нисбатан Жиноят кодексининг 135-моддаси иккинчи қисми (одам савдоси) билан жиноят иши қўзғатилиб, қамоққа олиш тарзидаги эҳтиёт чораси қўлланилган.
Ички ишлар органларининг эслатиб ўтишича, жорий йилдан бошлаб одам савдоси жинояти учун жавобгарлик кучайтирилиб, ушбу жиноятни содир этган шахсларга 5 йилдан 15 йилгача озодликдан маҳрум қилиш жазоси белгиланган.
