Тошкентдаги қурилиш объектида бетон плита босиб қолиши туфайли бир ишчи ҳалок бўлди
Яшнобод туманидаги қурилиш объектида содир бўлган бахтсиз ҳодиса юзасидан суриштирув олиб борилмоқда.
Тошкент шаҳрининг Яшнобод туманида жойлашган қурилиш объектларидан бирида содир бўлган бахтсиз ҳодиса оқибатида 25 ёшли ишчи вафот этди. Бу ҳақда “Миллар” дастури хабар берди.
Маълум қилинишича, ҳодиса Олмос маҳалласидаги қурилиш майдонида юз берган. Дастлабки маълумотларга кўра, Сурхондарё вилоятида туғилган 25 ёшли йигитни бетон плита босиб қолган.
Гувоҳларнинг айтишича, ҳодиса иш жараёнида содир бўлган. Воқеа ҳақида Фавқулодда вазиятлар хизматига хабар берилган. Ҳодиса жойига қутқарувчилар ва тез тиббий ёрдам бригадаси етиб келган. Жабрланувчи кран ёрдамида чиқариб олинган.
Яшнобод тумани тез тиббий ёрдам бўлими раҳбари Санжар Қодировнинг маълум қилишича, 3 июль куни қурилиш объектидан келиб тушган чақириққа асосан бригада зудлик билан етиб борган. Бироқ воқеа жойида эркак оғир тан жароҳатлари оқибатида вафот этгани аниқланган.
Ҳозирда ҳодиса юзасидан суриштирув ишлари олиб борилмоқда. Қурилиш объектининг ҳудуди ўраб қўйилган.
