Трамп ёрдам беролмади — Бельгия АҚШни йирик ҳисобда мағлуб этди

 

АҚШ, Канада ва Мексикада давом этаётган 2026 йилги FIFА Жаҳон чемпионатининг 1/8 финал босқичида Бельгия терма жамоаси мезбонлардан бири бўлган АҚШни 4:1 ҳисобида мағлуб этди.

 

Учрашув қаҳрамони бельгиялик ҳужумкор ярим ҳимоячи Чарлз Де Кетелаэре бўлиб, у иккита гол муаллифига айланди. Яна икки голни Ҳанс Ванакен ҳамда захирадан майдонга тушган Ромелу Лукаку киритди. АҚШ сафидаги ягона гол эса Малик Тиллман томонидан жарима зарбасидан урилди.

 

Мазкур ғалаба эвазига Бельгия чорак финал йўлланмасини қўлга киритди ва энди Испания терма жамоасига қарши майдонга тушади. Испания 1/8 финалда Португалияни мағлуб этиб, кейинги босқичга йўл олганди. Чорак финал учрашуви 10 июль куни бўлиб ўтади.

 

АҚШ учун эса ушбу мағлубият ўз майдонида ўтаётган Жаҳон чемпионатидаги иштирокнинг якунланишини англатди.

 

Учрашув олдидан америкалик ҳужумчи Фоларин Балогун билан боғлиқ вазият ҳам муҳокамаларга сабаб бўлди. У аввалги ўйинда қизил карточка олгани боис Бельгияга қарши баҳсни ўтказиб юбориши кутилаётган эди. Бироқ FIFА унинг дисквалификациясини бекор қилди ва футболчи учрашувни тўлиқ ўтказди. Бу қарор АҚШ президенти Доналд Трампнинг ФИФА раҳбарияти билан мулоқоти ортидан қабул қилинган.