ЖЧ-2026: Аргентина супер камбэк эвазига Мисрни мағлуб этиб, чорак финалга йўл олди
2:0 ҳисобида олдинда бораётган Миср баҳс сўнгида ғалабани қўлдан чиқарди.
Жаҳон чемпионатининг 1/8 финал босқичидан ўрин олган Аргентина ва Миср терма жамоалари ўртасидаги баҳс мухлисларга ҳақиқий драмани тақдим этди. Икки тўп фарқи билан ортда бораётган амалдаги жаҳон чемпионлари учрашувни камбэк билан якунлаб, чорак финал йўлланмасини қўлга киритди.
Баҳснинг 15-дақиқасида Иброҳим Мисрни ҳисобда олдинга олиб чиқди. Иккинчи бўлимда Зико мезбонларнинг устунлигини янада мустаҳкамлади. Шу тариқа, мисрликлар 67-дақиқага келиб 2:0 ҳисобида олдинда бораётганди.
Аргентина эса сўнгги дақиқаларда ўйинни бутунлай ўзгартирди. 79-дақиқада Кристиан Ромеро ҳисобни қисқартирди. Орадан тўрт дақиқа ўтиб, Лионел Месси мувозанатни тиклади. Асосий вақтга қўшиб берилган 90+3-дақиқада эса Энсо Фернандес ғалаба голини уриб, аргентиналикларга 3:2 ҳисобидаги иродали ғалабани тақдим этди.
Қайд этиш жоиз, Месси учрашувнинг 21-дақиқасида пенальти тепиш имкониятига эга бўлган, бироқ ундан фойдалана олмади.
ЖЧ-2026. 1/8 финал
Аргентина — Миср 3:2
Голлар: Ромеро 79, Месси 83, Энсо Фернандес 90+3 — Иброҳим 15, Зико 67.
Ушбу ғалабадан сўнг Аргентина чорак финал йўлланмасини қўлга киритди ва ушбу босқичда улар Колумбия — Швейцария ғолибига қарши майдонга тушади.
