ЖЧ-2026: Испания сўнгги дақиқаларда урилган гол эвазига Португалияни мусобақадан чиқариб юборди
Криштиану Роналду бу сафар ҳам мундиалда омадсизликка учради.
Жаҳон чемпионатининг 1/8 финал босқичидан ўрин олган марказий учрашувда Испания ва Португалия терма жамоалари ўзаро тўқнаш келди.
Муросасиз кечган баҳс тақдирини учрашувнинг сўнгги дақиқалари ҳал қилди. Асосий вақтга қўшиб берилган 90+1-дақиқада захирадан майдонга тушган Микел Мерино рақиб дарвозасини ишғол қилиб, Испанияга 1:0 ҳисобидаги ғалабани тақдим этди.
Шу тариқа, Испания чорак финал йўлланмасини қўлга киритган бўлса, Португалия мундиал билан хайрлашди. Бу Криштиану Роналду учун фаолиятидаги сўнгги Жаҳон чемпионати бўлиши кутилаётган эди ва у турнирни 1/8 финал босқичидаёқ тарк этди.
ЖЧ-2026, 1/8 финал Португалия — Испания 0:1
Гол: Микел Мерино 90+1.
Маълумот ўрнида, Испания чорак финалда Белгия — АҚШ учрашуви ғолибига қарши майдонга тушади.
