Россия Starlink'ни ишдан чиқаришга уринмоқда

 
Россия армияси Украина томонидан қўлланилаётган узоқ масофали дронлар ҳужумини тўхтатиш мақсадида Илон Маскнинг Starlink сунъий йўлдош интернет тизими сигналини ишдан чиқаришга уринмоқда. Бу ҳақда Реутерс Запорижя вилоятида хизмат қилаётган украиналик дрон операторлари ва ҳарбий қўмондонларга таяниб хабар берди.

 

Маълумотларга кўра, Украина сўнгги ойларда "ўрта масофали зарба дронлари"дан фойдаланишни сезиларли даражада кенгайтирган. Старлинк орқали бошқариладиган ушбу аппаратлар Россиянинг фронт ортидаги таъминот йўллари, ёқилғи омборлари, ўқ-дори ташувчи юк машиналари ва ҳарбий техникаларига зарбалар бермоқда. Бу эса Россия логистикасига жиддий муаммолар туғдирмоқда.
 

Шу сабабли Россия электрон уруш воситаларини фаол қўллашни бошлаган. Украиналик ҳарбийларнинг айтишича, рус қўшинлари Волна, Купол ва Гарант каби замонавий радиоэлектрон кураш тизимларини жойлаштириб, Старлинк сигналларини бостиришга уринмоқда. Хусусан, Украина Мудофаа вазирлиги маслаҳатчиси Серҳий Бескрестновнинг айтишича, "Волна Купол Гарант" мажмуаси тахминан 20 квадрат километр ҳудудда Старлинк тармоғи ишлашига халақит бера олади.

 
Украиналик дрон операторларининг таъкидлашича, бундай тизимлар айрим ҳудудларда дронлар билан алоқани узиб қўяди ва уларнинг нишонга аниқ зарба беришини қийинлаштиради. Шу боис Украина армияси ушбу радиоэлектрон кураш мажмуаларини алоҳида нишон сифатида йўқ қилишга ҳаракат қилмоқда. Реутерс билан суҳбатлашган ҳарбийлардан бири Россиянинг Starlink'ни бостириш тизимлари "энг устувор нишонлардан бири" эканини айтган.

 
Россия фақат электрон кураш билан чекланмаяпти. Ҳарбийлар дронлардан яшириниш учун ёқилғи ташувчи машиналарни оддий фуқаролик транспорти кўринишига келтирмоқда, ҳарбий юкларни оддий юк машиналарида ташимоқда, айрим ҳолларда эса мототцикл ва квадроцикллардан фойдаланмоқда. Шунингдек, ёқилғи захиралари оддий ёқилғи қуйиш шохобчалари ва вақтинчалик яширин жойларда сақланаётгани айтилмоқда.