Болаларга зўравонлик қилган педагоглар бир йил боғчаларда ишлай олмайди
Сенат болаларни зўравонликдан ҳимоя қилиш, алимент тўловлари ва етим болаларни оилага жойлаштириш тартибини такомиллаштирувчи қонунни маъқуллади.
Олий Мажлис Сенатининг 17-ялпи мажлисида "Болаларни ижтимоий ҳимоя қилиш тизими такомиллаштирилиши муносабати билан Ўзбекистон Республикасининг айрим қонун ҳужжатларига қўшимча ва ўзгартиришлар киритиш тўғрисида"ги Қонун кўриб чиқилиб, маъқулланди.
Қайд этилишича, кейинги йилларда мамлакатда болаларнинг ҳуқуқлари, эркинликлари ва қонуний манфаатларини таъминлаш, уларни ҳар қандай зўравонлик шаклларидан ҳимоя қилиш ҳамда таълим муассасаларида хавфсиз муҳит яратишга қаратилган тизимли ислоҳотлар амалга оширилмоқда.
Янги қонунга мувофиқ, таълим ташкилотларида тарбия ва таълим жараёнида вояга етмаган болаларга нисбатан жисмоний зўравонлик содир этган ёки уларни таҳқирлаган шахслар учун Маъмурий жавобгарлик тўғрисидаги кодексда алоҳида жавобгарлик белгиланмоқда.
Шунингдек, педагогик фаолият давомида вояга етмаганларга нисбатан жисмоний ва (ёки) руҳий зўравонликка оид ҳуқуқбузарлик содир этгани учун маъмурий жавобгарликка тортилган шахслар бир йил давомида мактабгача таълим ташкилотларида педагогик фаолият билан шуғулланиш ҳуқуқидан маҳрум этилади.
Бундан ташқари, давлат ёки нодавлат муассасасининг тўлиқ таъминотида бўлган бола учун ота ёки онани алимент тўлашдан озод қилишга йўл қўйилмаслиги белгиланмоқда.
Шу билан бирга, етим болалар ҳамда ота-она қарамоғидан маҳрум бўлган болаларни оилага тарбияга бериш тартиби ҳам такомиллаштирилиб, улар фақат ўз қариндошларига тарбияга берилиши назарда тутилмоқда.
Сенаторлар ушбу қонун болаларнинг ҳуқуқ ва қонуний манфаатларини янада ишончли ҳимоя қилиш, таълим муассасаларида уларнинг шаъни, қадр-қиммати ва дахлсизлигини таъминлаш бўйича ҳуқуқий кафолатларни мустаҳкамлашга хизмат қилишини таъкидлаб, ҳужжатни маъқуллади.
