Германияда жазирама фонида ўлим ҳолатлари кескин ошди
Июнь охиридаги жазирама даврида ўлим ҳолатлари сўнгги уч йиллик ўртача кўрсаткичдан 5,6 минг нафарга ошган.
Германияда июнь ойининг охирида кузатилган кучли иссиқ ҳаво тўлқини фонида ўлим ҳолатлари сезиларли даражада ошгани қайд этилди. Бу ҳақда мамлакат Федерал статистика бошқармасининг дастлабки маълумотларига таяниб, Spiegel нашри хабар берди.
Маълумотларга кўра, 22–28 июнь кунлари мамлакат бўйлаб 23 655 нафар фуқаро вафот этган. Бу кўрсаткич сўнгги уч йилнинг айни давридаги ўртача кўрсаткичдан 5 655 тага кўп.
Шу билан бирга, мутахассислар ўлим ҳолатларининг барчасини бевосита жазирама билан боғлашга шошилмаслик кераклигини таъкидламоқда.
Кёлн шошилинч тиббий ёрдам хизмати тиббий директори Александр Лехлейтнернинг қайд этишича, юқори ҳарорат ўлим кўрсаткичларига таъсир қилгани эҳтимолдан холи эмас, бироқ унинг аниқ улушини белгилаш мураккаб.
“Юқори ҳароратнинг таъсири борлигига шубҳа йўқ. Аммо бу таъсирнинг қанчалик катта эканини аниқлаш кўпинча мушкул”, — деган у.
Мутахассиснинг сўзларига кўра, айниқса ёши катта ёки сурункали касалликларга чалинган беморлар вафот этган ҳолатларда иссиқ ҳаво билан тўғридан-тўғри сабаб-оқибат боғлиқлигини аниқлаш қийин ҳисобланади.
