Ўзбекистон Президентининг Беларусга расмий ташрифи якунланди
Президент Шавкат Мирзиёев Тошкент шаҳрига жўнаб кетди. Олий мартабали меҳмонни Александр Лукашенко кузатиб қўйди.
Ўзбекистон Республикаси Президенти Шавкат Мирзиёевнинг Беларусга расмий ташрифи якунланди. Пойтахт аэропортида олий мартабали меҳмонни Беларус Республикаси Президенти Александр Лукашенко кузатиб қўйди.
Минск шаҳрида давлат раҳбарларининг тор доирадаги ҳамда расмий делегациялар иштирокидаги музокаралари бўлиб ўтди. Етакчилар сиёсий мулоқотни янада ривожлантириш ҳамда парламентлараро ҳамкорликни мустаҳкамлаш муҳимлигини таъкидладилар. Кўп қиррали шерикликни узоқ муддатли ривожлантириш борасидаги интилиш қатъий экани тасдиқланди, устувор йўналишлардаги янги лойиҳавий ташаббуслар кўриб чиқилди.
Музокаралар якунида Президентлар Стратегик шериклик муносабатларини ўрнатиш тўғрисидаги декларацияни имзоладилар. Улар ҳузурида икки томонлама ҳужжатларни алмашиш маросими ҳам бўлиб ўтди.
Оммавий ахборот воситалари вакиллари учун баёнотларда ушбу расмий ташриф Ўзбекистон – Беларус муносабатлари ривожида тарихий воқеа, мамлакатлар ўртасидаги ҳамкорликни мустаҳкамлашда янги босқичнинг бошланиши экани мамнуният билан қайд этилди.
Расмий ташриф тадбирлари якунлангач, Президент Шавкат Мирзиёев Тошкент шаҳрига жўнаб кетди.
