Эронда Хоманаийнинг дафн маросимидан сўнг отишма юз берди
Имом Ризо мақбарасидан 15 километр узоқликда содир бўлган отишма оқибатида икки киши ҳалок бўлган.
Эроннинг Машҳад шаҳрида собиқ Олий раҳбар Али Хоманаийнинг дафн маросими якунланганидан сўнг содир бўлган отишма оқибатида икки киши ҳалок бўлди. Бу ҳақда Sabereen News Разавий Хуросон вилояти хавфсизлик масалалари бўйича директор ўринбосарига таяниб хабар берди.
Маълум қилинишича, ҳодиса Машҳаднинг ғарбий қисмидаги Сарфарзан туманида, Имом Ризо мақбараси мажмуасидан 15 километрдан ортиқ масофада содир бўлган. Ҳозирча отишма сабаблари ҳамда ҳалок бўлганларнинг шахси расман очиқланмаган.
Расмийларнинг билдиришича, Имом Ризо мақбараси ҳудудида ёки дафн маросими ўтказилган йўналишда хавфсизлик билан боғлиқ ҳеч қандай ҳодиса қайд этилмаган.
Эслатиб ўтамиз, Али Хоманаийнинг дафн маросими 9 июль куни Машҳадда якунланди. У жорий йил 28 февраль куни АҚШ ва Исроил томонидан Теҳронга уюштирилган ҳаво ҳужумлари оқибатида ҳалок бўлган эди. Дафн маросими Имом Ризо мақбараси ҳудудида ўтказилиб, маросим шаҳарнинг марказий кўчалари бўйлаб бир неча километрга чўзилган.
Ҳозирда Эрон ҳуқуқни муҳофаза қилувчи органлари отишма юзасидан тергов ҳаракатларини олиб бормоқда.
