Франция Жаҳон чемпионатининг илк ярим финалчисига айланди
Жамоа чорак финалда Марокашни 2:0 ҳисобида мағлуб этди.
Франция терма жамоаси 2026 йилги FIFА Жаҳон чемпионатининг чорак финалида Марокашни 2:0 ҳисобида мағлуб этиб, мусобақанинг ярим финалига чиққан илк жамоага айланди.
АҚШнинг Массачусетс штатидаги Gillette Stadium'да бўлиб ўтган учрашувнинг биринчи бўлимида ҳисоб очилмади. Франция сардори Килиан Мбаппе 28-дақиқада пенальти тепиш имкониятидан фойдалана олмади. Шунга қарамай, иккинчи бўлимда французлар ташаббусни тўлиқ ўз қўлига олди.
Ҳисоб 60-дақиқада Килиан Мбаппе томонидан очилди. Орадан олти дақиқа ўтиб эса Усмон Дембеле Мбаппенинг узатмасидан унумли фойдаланиб, жамоасининг иккинчи голини киритди ва учрашув тақдирини ҳал қилди.
Мазкур ғалаба эвазига Франция Жаҳон чемпионати тарихида саккизинчи марта ярим финалга чиқиб, Бразилиянинг рекордини такрорлади. Шунингдек, французлар кетма-кет учинчи бор мундиал ярим финалида иштирок этадиган бўлди.
Ярим финалда Диде Дешам шогирдлари Испания – Бельгия учрашуви ғолибига қарши майдонга тушади. Ушбу баҳс 14 июль куни Далласда бўлиб ўтади.
