Уйида 20 кгдан ортиқ наркотик сақлаган 58 ёшли шахс ушланди
Шунингдек, Тошкентда виртуал наркоканал ташкил қилган икки нафар шахс ҳам қўлга олинган.
ДХХ маълумотига кўра, “Хавфсиз ва соғлом юрт” тезкор тадбир давомида 1968 йилда Сурхондарё вилоятида туғилган фуқаронинг Тошкент шаҳридаги вақтинча яшаш хонадони холислар иштирокида кўздан кечирилган.
Натижада хонадондан 13 килограмм 50 грамм опий ҳамда 7 килограмм 137 грамм гашиш аниқланиб, ашёвий далил сифатида расмийлаштириб олинган. Шу тариқа жами 20 килограммдан ортиқ гиёҳвандлик воситаси мусодара қилинган.
Мазкур ҳолат юзасидан ДХХ Тергов бошқармаси томонидан фуқаро устидан Жиноят кодексининг 246 ва 273-моддалари билан жиноят иши қўзғатилган.
Ҳозирда тергов доирасида унинг эҳтимолий жиноий шериклари ҳамда наркотик моддаларнинг келиб чиқиш манбаларини аниқлаш бўйича тезкор-тергов ҳаракатлари давом эттирилмоқда.
Бундан ташқари, ДХХнинг Тошкент шаҳар бўйича бошқармаси ҳамда пойтахт ИИББ ходимлари ҳамкорлигида ўтказилган яна бир тезкор тадбирда виртуал наркоканал ташкил қилган 1991 ва 2000 йилларда туғилган икки нафар фуқаро қўлга олинган.
Улардан гашиш ва гашиш мойи мусодара қилинган.
Маълум қилинишича, қўлга олинганлардан бири илгари Жиноят кодексининг бир неча моддалари билан судланган, иккинчиси эса жорий йилнинг апрель ойида гиёҳвандлик воситалари билан ушланиб, терговга гумондор сифатида жалб этилган бўлган.
Ҳозирда ҳар иккала ҳолат юзасидан тергов ҳаракатлари давом этмоқда.
