ЖЧ–2026: Сўнгги дақиқалардаги гол Испанияни ярим финалга олиб чиқди
Испания терма жамоаси Бельгияни 2:1 ҳисобида мағлуб этди.
Испания терма жамоаси 2026 йилги футбол бўйича Жаҳон чемпионати чорак финалида Бельгияни 2:1 ҳисобида мағлуб этиб, мусобақанинг ярим финалига йўл олди.
АҚШнинг Инглевуд шаҳридаги SoFi Stadium'да бўлиб ўтган учрашувни англиялик ҳакам Майкл Оливер бошқариб борди.
Ҳисоб учрашувнинг 30-дақиқасида Испания ярим ҳимоячиси Фабиан Руис томонидан очилди. Бельгия эса биринчи бўлим якунланишидан олдин жавоб қайтаришга муваффақ бўлди. 41-дақиқада ҳужумчи Шарл Де Кетелар ҳисобни тенглаштирди.
Иккинчи бўлимнинг 71-дақиқасида Бельгия дарвозабони Тибо Куртуа жароҳат сабаб майдонни тарк этди ва унинг ўрнига Сенне Ламменс майдонга тушди.
Учрашув тақдири асосий вақт якунланишига оз қолганида ҳал бўлди. 88-дақиқада Ламменснинг хатосидан унумли фойдаланган Микел Мерино Испания терма жамоасининг ғалаба голини киритди ва жамоасини ярим финалга олиб чиқди.
Мазкур ғалабадан сўнг Испания терма жамоаси 14 июль куни бўлиб ўтадиган ярим финал баҳсида Францияга қарши майдонга тушади.
Маълумот учун, 2026 йилги футбол бўйича Жаҳон чемпионати АҚШ, Канада ва Мексика мезбонлигида ўтказилмоқда. Мусобақа финали 19 июль куни Ню-Ёрк штатининг Шарқий Резерфорд шаҳрида бўлиб ўтади.
