Каннаваронинг Ўзбекистон МТЖдаги келажаги маълум бўлди
ЖЧдаги қониқарсиз натижалар сабаб италиялик мураббийнинг терма жамоадан кетиши ҳақида миш-мишлар пайдо бўлганди.
Ўзбекистон миллий терма жамоаси бош мураббийи Фабио Каннаваро ўз лавозимида қолади ва жамоани 2027 йилги Осиё кубогига тайёрлайди. Бу ҳақда Championat.asia нашри хабар берди.
Манба маълумотига кўра, Ўзбекистон футбол ассоциацияси раҳбарияти италиялик мутахассис фаолиятига ишонч билдирмоқда. Шу сабабли Каннаваро терма жамоа билан ишлашни давом эттиради ҳамда жамоани навбатдаги йирик мусобақа — Саудия Арабистонида бўлиб ўтадиган Осиё кубогига бошлаб боради.
Қайд этилишича, ЖЧ-2026 якунланганидан сўнг мураббий олдига Осиё кубогида юқори натижа қайд этиш, хусусан, чемпионлик учун курашиш вазифаси қўйилган.
Шунингдек, яқин кунларда Фабио Каннаваро терма жамоанинг навбатдаги ўқув-машғулот йиғинлари режасини ишлаб чиқиши ва Осиё кубогига тайёргарликнинг янги босқичини бошлаши кутилмоқда.
Мураббийлар штаби таркибни янада шакллантириш ҳамда қитъа биринчилигига пухта тайёргарлик кўришга асосий эътиборни қаратади.
