Тошкентдаги "Ўзбекистон" меҳмонхонасида ёнғин содир бўлди
Меҳмонхонанинг 10-қаватидаги ишчилар хонаси ёниб зарарланган. Ҳодиса оқибатида жабрланганлар йўқ.
Фавқулодда вазиятлар вазирлиги маълумотига кўра, 12 июль куни соат 14:45 да Мирзо Улуғбек тумани Мустақиллик шоҳ кўчасида жойлашган "Ўзбекистон" меҳмонхонасининг 10-қаватида ёнғин содир бўлаётгани ҳақида Тошкент шаҳар Фавқулодда вазиятлар бош бошқармасига хабар келиб тушган.
Қутқарув экипажлари воқеа жойига соат 14:49 да етиб бориб, ёнғинни соат 14:54 да тўлиқ ўчирган.
Дастлабки маълумотларга кўра, меҳмонхонанинг 10-қаватидаги ишчи хизматчилар хонаси ёниб зарарланган. Бинода ўрнатилган ёнғинга қарши хавфсизлик тизимлари ўз вақтида ишга тушгани сабабли ёнғин қисқа фурсатда бартараф этилган.
Ҳодиса оқибатида тан жароҳати олганлар йўқ.
