Европада жазирама туфайли бир ҳафтада 10 мингдан ортиқ ўлим қайд этилди
Рекорд даражадаги иссиқлик тўлқини 27 Европа мамлакатида минглаб қўшимча ўлим ҳолатларига сабаб бўлди.
Июнь ойи охирида Ғарбий Европани қамраб олган рекорд даражадаги жазирама оқибатида 27 та Европа мамлакатида ўлимлар сони одатдагидан 10 мингдан зиёдга кўпайди. Бу ҳақда ECDC ва Жаҳон соғлиқни сақлаш ташкилоти кўмагида фаолият юритувчи EuroMOMO тармоғи маълумотларига таяниб, Reuters хабар берди.
Ҳисоботга кўра, 22–28 июнь кунлари қайд этилган 10 650 та қўшимча ўлимнинг 9 мингдан ортиғи 65 ёш ва ундан катта ёшдаги фуқаролар ҳиссасига тўғри келган. Мутахассислар юқори ўлим кўрсаткичини, асосан, рекорд даражадаги иссиқ об-ҳаво билан изоҳламоқда.
Даниянинг Statens Serum Institut бош шифокори Лассе Вестергаарднинг айтишича, йилнинг бу даврида бундай даражадаги ортиқча ўлим одатий ҳол эмас ва уни жазирамадан бошқа омил билан изоҳлаш қийин.
Олимлар июнь ойи охиридаги иссиқ тўлқини инсон фаолияти туфайли юзага келаётган глобал иқлим ўзгаришисиз деярли имконсиз бўлишини таъкидламоқда. Уларнинг фикрича, иқлим ўзгариши жазирама тўлқинларини янада тез-тез ва кучлироқ кузатилишига олиб келмоқда.
EuroMOMO маълумотларига кўра, июнь ойининг сўнгги ҳафтасида Франция ва Белгия Европада "жуда юқори ортиқча ўлим" қайд этилган ягона давлатлар бўлган. Белгияда эса бу кўрсаткич 2000 йилдан буён кузатилган барча жазирама даврлари орасида энг юқориси сифатида қайд этилган.
Шунингдек, Imperial College London, Буюк Британия Метеорология хизмати ва Лондон гигиена ҳамда тропик тиббиёт мактаби олимлари томонидан эълон қилинган алоҳида тадқиқотда май ва июнь ойларида фақат Англия ва Уэлснинг ўзида 2,7 минг киши иссиқлик билан боғлиқ сабаблар оқибатида вафот этгани тахмин қилинган.
Тадқиқот муаллифларига кўра, ушбу ўлимларнинг 42 фоизи глобал исиш кучайтирган жазирама таъсири билан боғлиқ.
