Ироқда коррупцияга қарши кампания доирасида 375 килограмм олтин мусодара қилинди
Мусодара қилинган олтин коррупцияда гумонланаётган собиқ нефть вазири ўринбосари Аднан ал-Жумайлийга оид жиноят иши доирасида аниқланган.
Ироқ ҳуқуқни муҳофаза қилувчи органлари коррупцияга қарши кенг кўламли кампания доирасида 375 килограмм олтинни мусодара қилди. Бу ҳақда Al Jazeera хабар берди.
Маълум қилинишича, қимматбаҳо металл коррупцияда гумонланаётган нефтни қайта ишлаш масалалари бўйича собиқ нефть вазири ўринбосари Аднан ал-Жумайлийга оид жиноят иши доирасида аниқланган.
Ироқ Олий суд кенгаши маълумотига кўра, Курдистон минтақавий ҳукумати билан ҳамкорликда ўтказилган операция давомида 358 килограмм олтин, алоҳида тергов доирасида эса яна 17 килограмм олтин мусодара қилинган. Олтин Ироқ Марказий банкига топширилган.
Тергов маълумотларига кўра, Аднан ал-Жумайлий давлат ресурслари ва ҳукумат шартномаларидан ноқонуний фойдаланиб, пора ва шахсий манфаат эвазига коррупсион схемаларни йўлга қўйганликда гумон қилинмоқда. У май ойида ҳибсга олинган, 2 июнь куни эса расман лавозимидан четлатилган.
Мазкур иш доирасида аввалроқ ёмғир суви оқизиш қувуридаги чуқурдан 14 миллиард Ироқ динори (10,6 миллион доллар) нақд пул топилгани ҳам маълум қилинган эди. Ҳукумат ҳисоб-китобига кўра, фақат ушбу ишнинг ўзида аниқланган маблағлар 127 миллиард Ироқ динори (96 миллион доллар) ҳамда қўшимча 24 миллион доллар, кўчмас мулклар, автомобиллар ва олтин тақинчоқларни ташкил этади.
Расмийларга кўра, терговлар давлат маблағларининг талон-торож қилинишини фош этишга қаратилган “Тонг операцияси” (Оperation Dawn) доирасида олиб борилмоқда. Кампания давомида бир неча юқори лавозимли мансабдорлар, жумладан, депутатлар ҳам ҳибсга олинган, айримларининг дахлсизлиги бекор қилинган.
Ироқ ҳукумати хорижда яшаётган юзлаб гумондорларни экстрадиция қилиш ва четга олиб чиқилган активларни қайтариш чораларини ҳам кўрмоқда.
