Самарқандда прокурорга нисбатан жиноят иши қўзғатилди
Мансабдор газдан ноқонуний фойдаланиш бўйича зарар миқдорини камайтириш эвазига пора олган.
Самарқанд вилоятида Ургут тумани прокурори ўринбосарига нисбатан пора олиш ва мансаб ваколатларини суиистеъмол қилиш ҳолатлари юзасидан жиноят иши қўзғатилди. Бу ҳақда Давлат хавфсизлик хизмати маълум қилди.
Аниқланишича, у Пастдарғом тумани прокуратурасида фаолият юритган даврида хизмат мавқеидан фойдаланиб, маҳаллий МЧЖ томонидан табиий газдан ноқонуний фойдаланилиши оқибатида давлатга етказилган 2 миллиард 887 миллион сўмлик зарарни 805,9 миллион сўмга камайтириб бериш эвазига воситачилар орқали 6,5 минг АҚШ доллари ва 35 миллион сўм пора олган.
Шунингдек, мансабдор шахс мазкур МЧЖ мансабдорларига нисбатан Жиноят кодексининг 169-моддаси билан қўзғатилган жиноят иши доирасида зарар миқдорини 150–200 миллион сўмгача камайтириш ҳамда судда енгилроқ жазо тайинланишига кўмаклашишни ваъда қилиб, корхона эгасидан 15 минг АҚШ доллари талаб қилгани аниқланган.
Прокурор ўринбосарининг ноқонуний ҳаракатлари юзасидан ашёвий далиллар процессуал тартибда расмийлаштирилган.
Мазкур ҳолат юзасидан унга нисбатан жиноят иши қўзғатилиб, қамоқ эҳтиёт чораси қўлланилган. Ҳозирда дастлабки тергов ҳаракатлари давом эттирилмоқда.
