Сурхондарёда болаларга ноқонуний диний таълим берган шахслар ушланди
Болаларнинг ота-оналарига нисбатан амалдаги қонунчилик асосида тегишли чоралар кўрилмоқда.
Сурхондарё вилоятида ички ишлар органлари ва Давлат хавфсизлик хизмати ходимлари томонидан ўтказилган тезкор тадбир давомида вояга етмаганларга ноқонуний диний таълим бериш ҳолати фош этилди. Бу ҳақда ИИВ хабар берди.
Маълум қилинишича, Термиз шаҳрида 1971 ва 1996 йилларда туғилган икки нафар фуқаро ўз яшаш хонадонида беш нафар вояга етмаган болага моддий манфаат эвазига, тегишли рухсатларсиз ҳамда амалдаги қонунчилик талабларига зид равишда диний таълим бериб келган.
Тезкор тадбир давомида хонадондан 14 дона диний адабиёт процессуал тартибда ҳужжатлаштириб олинган.
Мазкур ҳолат юзасидан гумонланувчиларга нисбатан Жиноят кодексининг 229²-моддаси асосида жиноят иши қўзғатилиб, тергов ҳаракатлари олиб борилмоқда.
Шунингдек, ноқонуний диний таълим олган вояга етмаганларнинг ота-оналарига нисбатан ҳам амалдаги қонунчиликка мувофиқ тегишли чоралар кўрилаётгани билдирилди.
