Аномал иссиқда қатор ҳудудларда болалар очиқ ҳаводаги тадбирларга жалб этилди
Болалар омбудсмани жазирама кунларда болалар саломатлигини ҳимоя қилиш юзасидан расмий муносабат билдирди.
Навоий, Қашқадарё ва Сурхондарё вилоятларидаги айрим мактаб ҳамда мактабгача таълим муассасаларида июль ойининг дастлабки ўн кунлигида ўқувчилар ва тарбияланувчиларнинг очиқ ҳаводаги тадбирларга жалб этилгани юзасидан Болалар омбудсмани расмий муносабат билдирди.
Қайд этилишича, бундай ҳолатлар болалар саломатлигига салбий таъсир кўрсатиши мумкин ҳамда амалдаги санитария-гигиена талабларига зид ҳисобланади. Шу муносабат билан жазирама об-ҳаво шароитида болаларни очиқ майдонларда ўтказиладиган тадбирларга жалб этишни чеклаш зарурлиги таъкидланди.
Шунингдек, юқори ҳарорат ва тўғридан тўғри қуёш нурлари остида болаларнинг бўлишига йўл қўйган масъулларга нисбатан тегишли чоралар кўрилиши ҳамда бундай ҳолатларнинг такрорланишига йўл қўймаслик бўйича зарур чоралар кўрилиши лозимлиги қайд этилди.
Мазкур ҳолат юзасидан Қашқадарё вилояти Мактабгача ва мактаб таълими бошқармаси ҳам муносабат билдириб, ижтимоий тармоқларда тарқалган фото ва видеолар жорий кунларда эмас, 8 июль куни Деҳқонобод туманида ўтказилган тадбир давомида тасвирга олинганини маълум қилди.
Бошқарма маълумотига кўра, ҳозирда барча ҳудудий бўлимларга аномал иссиқ кунларда “Долзарб 90 кун” тадбирларини имкон қадар ёпиқ ёки салқин жойларда ташкил этиш, болаларнинг саломатлиги ва хавфсизлигини устувор вазифа сифатида таъминлаш юзасидан тегишли кўрсатмалар берилган. Шунингдек, айрим ижтимоий тармоқ саҳифалари ҳолатни расмий манбалар орқали аниқлаштирмасдан эълон қилгани ҳам танқид қилинди.
