Тошкентда солиқчи, Фарғонада электр таъминоти муҳандис пора билан ушланди
Ҳар икки ҳолат юзасидан жиноят иши қўзғатилиб, тергов ҳаракатлари олиб борилмоқда.
Тошкент ва Фарғона вилоятларида мансабдор шахсларнинг ноқонуний пора талаби билан боғлиқ икки ҳолат фош этилди. Бу ҳақда ДХХ хабар берди.
Маълум қилинишича, Тошкент вилоятининг Зангиота туманидаги “Чинни бозор” савдо мажмуасида фаолият юритувчи якка тартибдаги тадбиркор фаолияти юзасидан солиқ текшируви ўтказилган. Текширув давомида тадбиркор савдо тушумларини шахсий банк картаси орқали қабул қилиб, уларни тадбиркорлик ҳисоб рақамига киритмагани аниқланган.
Шундан сўнг Зангиота тумани Солиқ инспекциясининг бош инспектори тадбиркорга 160 миллион сўм жарима қўлланилишини айтиб, ушбу масалани ҳал қилиб бериш эвазига 1000 АҚШ доллари талаб қилган.
Давлат хавфсизлик хизмати ҳамда Бош прокуратура ҳузуридаги Иқтисодий жиноятларга қарши курашиш департаменти ходимлари ҳамкорлигида ўтказилган тезкор тадбирда солиқчининг топшириғи билан тадбиркордан пулни олган воситачи ашёвий далиллар билан ушланган.
Шунга ўхшаш ҳолат Фарғона вилоятининг Бувайда туманида ҳам аниқланган. Тезкор тадбир давомида туман Электр таъминоти корхонаси муҳандиси қуёш панеллари ўрнатиш билан шуғулланувчи тадбиркордан ноқонуний равишда 1000 АҚШ доллари олаётган вақтида қўлга олинган.
Тергов маълумотларига кўра, муҳандис тадбиркорга мижозлар йўналтириш, зарур ҳужжатларни расмийлаштириш ва техник шартнома олишда ёрдам бериш эвазига жами 5 минг АҚШ доллари талаб қилган.
Ҳар икки ҳолат юзасидан мансабдор шахсларга нисбатан жиноят ишлари қўзғатилиб, тергов ҳаракатлари олиб борилмоқда.
