Туркманистонда Ўзбекистон SIM карталарига қарши рейдлар бошланди

Туркманистонда Ўзбекистон мобил алоқа операторларининг SIM карталаридан фойдаланаётган фуқароларни аниқлаш бўйича рейдлар ўтказилмоқда. Бу ҳақда Озодлик радиоси хабар берди.

 

Маълум қилинишича, Ўзбекистон билан чегарадош Тошҳовуз вилоятидаги 60 дан ортиқ аҳоли пунктида текширувлар олиб борилмоқда. Сўнгги кунларда Диовар қишлоғида камида ўнта оиладан Ўзбекистон операторларига тегишли СИМ карталар мусодара қилинган. 

 

Хабарга кўра, айрим ҳолатларда ҳуқуқ-тартибот идоралари фуқароларни огоҳлантириш билан чекланмоқда. Бироқ кўпчиликка хорижий алоқа хизматларидан фойдаланганлик учун 50 минг манат миқдорида жарима ёки қамоқ жазоси қўлланиши мумкинлиги айтилмоқда. 

 

Расмийлар буни айрим ҳолларда хорижий давлат манфаатига жосуслик сифатида баҳоланиши мумкинлиги билан изоҳлаётгани қайд этилган. Чегараолди ҳудудлари аҳолиси журналистларга Туркманистон алоқа операторларида сигнал сифати пастлиги ва интернетдан фойдаланиш имкониятлари чеклангани сабаб Ўзбекистон операторлари хизматларини афзал кўришини билдирган. 

 

Уларнинг таъкидлашича, Ўзбекистон мобил интернети тезлиги маҳаллий операторларникидан бир неча юз баравар юқори. Шу сабабли Ўзбекистонга тез-тез қатнайдиган туркманистонликлар у ердан SIM карталар ва Wi-Fi роутерлар олиб киради. Айрим тадбиркорлар эса қўшни давлат операторларига уланиш хизматларини пулли асосда таклиф қилиб, ускуналарни рўйхатдан ўтказишда ҳам ёрдам беради. Ҳудудда энг оммабоп тармоқлар сифатида Uztelecom ва Ucell тилга олинмоқда. 

 

Озодлик радиоси суҳбатлашган манбаларга кўра, рейдларнинг кучайишига Тошҳовуз вилоятида бир эркакнинг олти нафар фарзанди ва ўз жонига қасд қилгани ҳақидаги хабар интернетда кенг тарқалиб кетгани сабаб бўлиши мумкин. Тахминларга кўра, мазкур воқеа ҳақидаги маълумотлар Ўзбекистон операторлари мобил интернети орқали тарқатилгани ортидан назорат кучайтирилган. 

 

Шунингдек, манбалар Туркманистон куч ишлатар тузилмаларида Ўзбекистон SIM карталарини масофадан кузатишга имкон берувчи махсус ускуналар мавжуд эмаслигини билдирган. Шу боис қоидабузарларни аниқлаш учун ҳуқуқни муҳофаза қилувчи органлар ходимлари жойларда бевосита текширувлар ўтказаётгани айтилмоқда.