Тошкент ва Қашқадарёда пора олган мансабдорлар қўлга олинди
15 минг доллар ва 17 млн сўм пора билан боғлиқ коррупцион ҳолатлар юзасидан жиноят ишлари қўзғатилди.
Давлат хавфсизлик хизмати ҳамда ҳуқуқни муҳофаза қилувчи органлар томонидан ўтказилган тезкор тадбирлар давомида Тошкент шаҳри ва Қашқадарё вилоятида икки коррупцион ҳолат фош этилди. Бу ҳақда ДХХ маълум қилди.
Тошкент шаҳрида Давлат мулки объектларидан самарали фойдаланиш маркази ҳудудий бошқармасининг бош мутахассиси мансабдор танишлари орқали саноат зонаси балансидаги ер майдонини ижарага расмийлаштириш, ижара ҳақини камайтириш ҳамда корхонанинг аввалги қарздорлигини бартараф этиш эвазига 15 минг АҚШ доллари талаб қилган. У сўралган маблағни олган вақтида ашёвий далиллар билан ушланган.
Қашқадарё вилоятида эса Муборак тумани Электр таъминоти корхонаси бошлиғи ўринбосари электр тармоғига ноқонуний уланиш билан боғлиқ иш бўйича корхонага етказилган 103 миллион сўмлик зарарни 34 миллион сўмга камайтириб берганини айтиб, бунинг эвазига 17 миллион сўм талаб қилган. Мансабдорнинг ноқонуний ҳаракати пул маблағларини турмуш ўртоғи орқали олаётган вақтида қўлга олинган.
Ҳар икки ҳолат юзасидан жиноят ишлари қўзғатилиб, тергов ҳаракатлари олиб борилмоқда.
