Ўзбекистонда тақиқ ёки хатловдаги уйда рўйхатдан ўтишга рухсат берилади
Кўчмас мулкка оид ҳуқуқларни расмийлаштириш тартиби соддалаштирилади. Айрим ҳолатларда уй-жойни сотишдан олинган даромадни солиққа тортиш тартиби ҳам ўзгаради.
Президентнинг 2026 йил 15 июлдаги “Аҳолига кўрсатилаётган давлат хизматларини такомиллаштириш ҳамда фуқаролар учун қўшимча қулайликлар яратиш чора-тадбирлари тўғрисида”ги ПҚ–265-сон қарори қабул қилинди. Бу ҳақда “Ҳуқуқий ахборот” Теlegram-канали хабар берди.
Қарорга кўра, кўчмас мулкка бўлган ҳуқуқларни давлат рўйхатидан ўтказишда ҳуқуқ эгаси белгиланган муддатда рўйхатдан ўтказувчи органга мурожаат қилмаган бўлса, эндиликда унга маъмурий жавобгарлик қўлланилмайди. Бунинг ўрнига кечиктирилган муддатдан келиб чиқиб, рўйхатдан ўтказиш учун оширилган ставкада тўлов ундирилади.
Шунингдек, солиқ тўловчига тегишли турар жой мерос тариқасида ёки яқин қариндошидан ҳадъя сифатида ўтган бўлса, уни сотишдан олинган даромадни солиққа тортмаслик учун белгиланган муддат энди васият қилувчи ёки ҳадъя қилувчининг ушбу уй-жойга бўлган мулк ҳуқуқи давлат рўйхатидан ўтказилган санадан бошлаб ҳисобланади.
Қарор билан тақиқ ёки хатлов қўйилган турар жойда гаровга олувчининг розилигисиз яшаш ва доимий ёки вақтинча рўйхатдан ўтишга ҳам рухсат берилди.
Бунда рўйхатдан ўтказилаётган шахс мулкдор, гаровга олувчи ёки тақиқни қўйиш ва бекор қилишга масъул органнинг ички ишлар органларига мурожаати асосида унинг рўйхатдан ўтказилгани бекор қилинишига олдиндан розилик билдириши шарт.
