Эрон жуда тез орада мағлуб бўлади — Трамп

АҚШ президенти Доналд Трамп Эрон билан давом этаётган кескинлик фонида мамлакати ушбу можарода тез орада устунликка эришишини маълум қилди.

Пенсилвания штатида ўтказилган мудофаа форумида сўзга чиққан Трамп: “Биз тез орада Эронни мағлуб этамиз. Улар жуда тез орада мағлуб бўлишади”, — деган.

Сўнгги ҳафталарда АҚШ ва Эрон ўртасидаги ҳарбий қарама-қаршилик кескинлашган. АҚШ ҳарбийлари 8 июлдан буён Эрондаги бир қатор нишонларга зарбалар берганини маълум қилган. АҚШ Марказий қўмондонлиги бу ҳужумларни Эроннинг Ҳормуз бўғози орқали ҳаракатланаётган тижорат кемаларига қарши ҳаракатларига жавоб сифатида изоҳлаган.

Бунга жавобан Эрон Яқин Шарқдаги айрим АҚШ ҳарбий базаларига зарбалар берганини билдирган.

12 июль куни Эрон АҚШнинг минтақадаги ҳарбий аралашуви тўхтамагунча Ҳормуз бўғозини ёпишини эълон қилган эди. Шундан сўнг Трамп Эронга нисбатан “тўлиқ денгиз блокадаси” жорий этилганини маълум қилиб, бу Эрон портларига йўл олган ёки у ердан чиқаётган, шунингдек Эрон юкларини ташиётган барча кемаларга тааллуқли бўлишини билдирган.

Шунингдек, Трамп аввалроқ Эронга “ўзини яхши тутишни” тавсия қилган ва ҳозирча Теҳрон билан музокараларни қайта бошлаш учун ҳеч қандай муддат белгилаш ниятида эмаслигини таъкидлаган.