Исроил қамоқхоналарни Нил тимсоҳлари билан қўриқламоқчи

 

Исроил миллий хавфсизлик вазири Итамар Бен-Гвир қамоқхоналар хавфсизлигини кучайтириш мақсадида Нил тимсоҳларидан фойдаланиш ташаббусини илгари сурди. Бу ҳақда Jerusalem Post хабар берди.

 

Маълум қилинишича, мазкур ғоя илк бор 2025 йилда Негев чўлидаги юқори хавфсизликка эга Кетзиот қамоқхонаси атрофида табиий ҳимоя тўсиғи яратиш таклифи сифатида илгари сурилган. Ушбу қамоқхонада асосан фаластинлик маҳбуслар ҳамда Ғазо можароси давомида қўлга олинган шахслар сақланади.

 

Аввалроқ Нил тимсоҳлари ҳимоя остидаги тур ҳисоблангани сабабли ташаббусни амалга оширишнинг ҳуқуқий имконияти мавжуд эмас эди. Бироқ Исроил Атроф-муҳитни муҳофаза қилиш вазирлиги судралиб юрувчиларнинг ҳуқуқий мақомини ўзгартириб, уларни муайян шартлар асосида "асирликда етиштирилган ёввойи ҳайвон" тоифасига киритди. Бу эса хавфсизлик идораларига уларни қамоқхона ҳудудида қўллаш имконини бериши мумкин.

 

Бен-Гвирнинг таъкидлашича, тимсоҳлардан фойдаланиш қамоқхоналардан қочиш ҳолатларининг олдини олиш ва қўриқлаш харажатларини камайтиришга хизмат қилиши мумкин.

 

Бироқ ташаббус экологлар ва ҳайвонларни ҳимоя қилиш ташкилотлари томонидан танқид қилинмоқда. Исроил Табиат ва боғлар бошқармаси вакиллари Нил тимсоҳлари фақат илмий ва таълим мақсадларида сақланиши кераклигини, уларни қамоқхона хавфсизлиги учун ишлатиш эса жиддий хавф туғдиришини билдирган. Мутахассислар бундай йиртқичларнинг қочиб кетиши инсонлар ҳаётига таҳдид солиши мумкинлигини ҳам қайд этмоқда.

 

Ҳозирча лойиҳа қачон амалга оширилиши бўйича расмий муддат эълон қилинмаган.