Самарқандда Қорадарёда аҳволи ёмонлашган эркак қутқариб қолинди
Дарёда чўмилаётган фуқаронинг бирдан соғлиги ёмонлашиб ҳаракатлана олмай қолган.
Самарқанд вилоятининг Самарқанд туманида чўмилиш вақтида аҳволи ёмонлашган фуқаро Фавқулодда вазиятлар вазирлиги қутқарувчилари томонидан қутқариб қолинди. Бу ҳақда ФВВ хабар берди.
Маълум қилинишича, ҳодиса 17 июль куни соат 17:53 да Самарқанд туманидаги "Ш. Рашидов" маҳалла фуқаролар йиғини ҳудудидан оқиб ўтувчи Қорадарё дарёсида содир бўлган. Фуқаро чўмилаётган пайтда бирдан ўзини ёмон ҳис қилиб, мустақил равишда ҳаракатлана олмай қолган. Унинг шериклари бу ҳақда "112" тизими орқали Фавқулодда вазиятлар бошқармасига хабар берган.
Воқеа жойига тезкор етиб борган қутқарувчилар махсус нарвон ёрдамида фуқарони дарё қирғоғидан хавфсиз ҳудудга олиб чиққан. Шундан сўнг унга малакали тиббий ёрдам кўрсатилиши учун тиббиёт ходимларига топширилган.
ФВВ маълумотига кўра, айни пайтда фуқаронинг аҳволи яхши.
