Зангиотадаги газ “заправка”сида юз берган портлаш сабаблари очиқланди

 

Тошкент вилоятининг Зангиота туманида автомобилларга суюлтирилган газ тўлдириш шохобчасида (АГТШ) юз берган портлаш бўйича дастлабки ўрганиш натижалари эълон қилинди.

 

Саноат, радиация ва ядро хавфсизлиги қўмитаси маълумотига кўра, ҳодиса 16 июль куни соат 22:46 атрофида Зангиота тумани Эркин маҳалласида жойлашган “Оҳангарон газ тўлдириш шохобчаси” МЧЖ ҳудудида содир бўлган.

 

Дастлабки ўрганишлар шуни кўрсатдики, мазкур шохобчага фақат автомобилларга суюлтирилган газ тўлдириш учун рухсат берилган бўлишига қарамай, у ерда белгиланган талабларга зид равишда маиший газ баллонларига ҳам газ қуйилган.

 

Ҳодиса вақтида «Лабо» русумли автомобилда олиб келинган 6 дона маиший газ баллонига қўлбола ўтиш мосламаси орқали газ тўлдирилаётган бўлган. Учинчи баллон тўлдирилаётган пайтда босим остидаги шланг ёрилиб, уланган жойидан ажралган. Натижада юзага келган чақнаш газ баллонларининг кетма-кет портлашига сабаб бўлган.

 

Портлаш оқибатида 2 та газ баллони портлаган, яна 4 таси ёниб, механик шикастланган.

 

Ҳодисада уч нафар фуқаро турли даражадаги куйиш жароҳатини олган. Улардан икки нафарининг аҳволи ўрта оғир (12–15 фоиз), бир нафарининг аҳволи эса оғир (80 фоиз) экани маълум қилинди. Жабрланганларга зарур тиббий ёрдам кўрсатилмоқда.

 

Айни пайтда воқеа жойида Саноат, радиация ва ядро хавфсизлиги қўмитаси мутахассислари ҳамда ҳуқуқни муҳофаза қилувчи органлар вакиллари иштирокида ўрганиш ишлари давом этмоқда.

 

Мазкур ҳолат юзасидан Жиноят кодексининг тегишли моддалари асосида жиноят иши қўзғатилган. Портлашнинг аниқ сабабларини аниқлаш мақсадида комплекс суд экспертизаси тайинланган.