Хоразмда Россиядан шоколад кўринишида юборилган гиёҳванд модда аниқланди
Тошкентда ҳам контрабанда йўли билан олиб кирилган гашишни олаётган шахс ушланди.
Хоразм ва Тошкентда 1,2 килограммдан ортиқ гашиш айланмасига чек қўйилди. Бу ҳақда ДХХ хабар берди.
Маълум қилинишича, Хоразм вилоятида ўтказилган тезкор тадбир давомида Урганч шаҳрида яшовчи, 1997 йилда туғилган ва аввал гиёҳвандлик воситалари билан боғлиқ жинояти учун судланган шахс Урганч халқаро аэропортида Россиядан юборилган посилкани қабул қилиб олаётган вақтида қўлга олинди.
Текширув давомида жўнатма ичидаги турли ширинликлар орасига шоколад кўринишида яширилган 538 грамм гашиш борлиги аниқланди.
Яна бир ҳолат Тошкент вилоятининг Юқоричирчиқ туманида қайд этилди. Унда Тошкент шаҳрида яшовчи 45 ёшли фуқаро наркокурерлар томонидан контрабанда йўли билан Ўзбекистонга олиб кирилиб, олдиндан яшириб қўйилган 700 грамм гашишни қабул қилиб олаётган вақтида ушланди.
Мазкур ҳолатлар юзасидан ҳар икки фуқаро устидан жиноят ишлари қўзғатилиб, тергов ҳаракатлари олиб борилмоқда. Шунингдек, уларнинг эҳтимолий шерикларини аниқлаш бўйича тезкор-қидирув тадбирлари давом эттирилмоқда.
