Россияда аёллар ҳам ҳарбий хизматга чақирилмоқда — ОАВ
Улардан айримлари қонунга зид равишда ҳарбий йиғинларга чақирилган. Экспертлар эса буни электрон тизимдаги носозлик билан изоҳламоқда.
Россияда ёз бошидан буён ҳарбий ҳисобда турувчи айрим аёлларга ҳарбий комиссариатлардан чақирув қоғозлари юборилмоқда. Уларнинг айримлари ҳарбий йиғинларга чақирилган бўлса-да, амалдаги қонунчилик аёлларни бундай йиғинларга жалб этишни тақиқлайди. Бу ҳақда Meduza хабар берди.
Маълумотларга кўра, июль ойи бошида радиореле ва тропосфера алоқаси мутахассислиги бўйича ҳарбий кафедрани тамомлаган, ҳозирда ҳомиладор бўлган аёл электрон реестр орқали "ҳарбий йиғинларни ўтказиш бўйича тадбирларда иштирок этиш учун" чақирув олган. Унинг айтишича, ҳарбий комиссариат ходимлари чақирув "сунъий интеллект томонидан юборилгани ва у жинсни ажрата олмагани" билан изоҳ берган. Орадан бир кун ўтиб, чақирув электрон реестрдан ўчириб ташланган.
Яна икки аёлга эса ҳарбий ҳисоб маълумотларини аниқлаштириш учун чақирув юборилган. Ҳозирча бу ҳолатлар бўйича бошқа чоралар кўрилмаган.
Қайд этилишича, 2022 йилда сафарбарлик эълон қилинганидан сўнг Россия Мудофаа вазирлиги аёллар ҳарбий хизматга чақирилмаслигини билдирган ва ўша пайтда юборилган чақирувларни техник хатолик билан изоҳлаган эди. Шунга қарамай, 2026 йилда Россиянинг айрим ҳудудларида аёлларни контракт асосида ҳарбий хизматга жалб қилиш бошланди.
Хусусан, Красноярскдаги коллеж талабаларига учувчисиз учиш аппаратлари қўшинларига қўшилиш таклиф қилинган. Томск вилояти ва Пермда ҳам аёлларни Россия Қуролли кучлари сафига контракт асосида хизматга чорловчи эълонлар тарқатилган.
"Школа призывника" ҳуқуқни ҳимоя қилиш ташкилоти юридик бўлими раҳбари Тимофей Васкиннинг айтишича, ҳарбий комиссариатларнинг аёлларга чақирув юбораётгани уруш шароитида сафарбарлик ресурсларини тўлиқ ҳисобга олиш ҳамда контракт асосида ҳарбий хизматга ёллаш билан боғлиқ бўлиши мумкин.
Экспертнинг таъкидлашича, аёлларни ҳарбий йиғинларга чақириш электрон ҳарбий ҳисоб реестридаги техник носозлик оқибатидир. Унинг айтишича, аёл ҳарбий комиссариатга борган тақдирда, ундан ҳарбий ҳисоб маълумотларини аниқлаштириш сўралади ва контракт асосида хизматга кириш таклиф қилиниши мумкин. Аёллар ҳарбий йиғинларга юборилмайди. Бироқ сафарбарлик эълон қилинса, ҳарбий ҳисобда турган аёллар ҳам хизматга чақирилиши эҳтимолини истисно қилиб бўлмайди.
Россия қонунчилигига кўра, ҳарбий ҳисоб фақат тегишли ҳарбий мутахассисликка эга ва соғлиғи бўйича яроқли деб топилган аёлларга нисбатан юритилади. Булар қаторига шифокорлар, провизорлар, ўрта тиббиёт ва фармацевтика ходимлари, алоқа соҳаси мутахассислари, компьютер операторлари, шунингдек, метеорология, картография ва геодезия соҳаларида фаолият юритувчи мутахассислар киради.
Васкин чақирув қоғози олган аёлларга ҳарбий комиссариатга боришдан олдин ҳуқуқшунос билан маслаҳатлашишни, комиссариатда эса мазмунини тўлиқ тушунмаган ҳужжатларга имзо қўймасликни тавсия қилган. Унинг қайд этишича, чақирув бўйича бормаслик айрим чекловлар ва жарималарга сабаб бўлиши мумкин, бироқ бу эҳтимолий сафарбарлик масаласига таъсир кўрсатмайди.
